عبدالله صبري
الشاي مريض – في الغربة- بالسُّكَّـر
ما يدوبوش لو علقوله المشنقة
حزبين معارضة اتوحدوا فـ حلق الغريب
ضدين و عاملين انقلاب ع المعلقة
في الغربه كل الناس قرايب في انحراف اللحن
نغم الحنين بيشدهم للعزف برا النوتة
المنطقية في الغياب
تعني غياب المنطقية
زي اتفاق الهربانين
علي عشق صوت البندقية
حتي العيال بيناموا علي صوت المنبـِّه
و يصحوا لو حدف القمر حدوتة
و الناس عناصر في المعادلة المضحكة
الليل ينشف حلمهم بالميــَّة
و الصبح يغسل جرحهم بالفوطة
حالة تناغم مربكة بين مفردات الإختلاف
الضحكة: تحريف اقتناص الحزن من بق الجفاف
و الحزن: إثبات احترام الضحك في كتاب الغضب
أكبر خطر ع القلب داء الإنسانية
أنسب علاج للأزمة تغيير النـِّسَبْ
في الغربة لما الشمس تطلع
تبقي طالعة مأمورية
لجل تكشف مين حزين أكتر
أو مين ولاد الكلب عشاق الكرامة
في الغربة لو قلبك خبط في الحلم تتاخد غرامة
في الغربة إسراف الوشوش في الحدة بيداري انكسار
في الغربة بتدوب الفروق بين الحياة والإنتحار
و انا و انتي دايمأً يا حبيبتي بحلمنا متغربين
جوا الوطن / برا الوطن/ جوانا حتي بنغترب
ازاي نقابل بعضنا و الأرض كوكب مضطرب
وازاي حنتلم فــ سكن
وانا كل ما ابني لِك وطن
ألمح عليه : لا تقتــــــــــــرب